Veikindaferð í sólina

 Í desember fórum við í ferð sem fer í annála sem slæm ferð eða sannkölluð veikindarferð.  Það sem átti að vera endurtekning á frábærri ferð fyrir tveir árum síðar stóðst ekki alveg undir væntingum.  Pétur fór með okkur til Gran Canary og við vorum á Aparthotels Don Pedro.  Gunnar fór að finna fyrir óþægindum strax í flugvélinni en bjóst nú bara við að hrista það af sér.  

Vikan byrjaði vel, ég vann á morgnana, við lágum í sólbaði og notuðum ískalda sundlaugina, í seinni partinn spiluðum við á svölunum og fundum góða veitingastaði á kvöldin. Við Pétur fórum einu sinni á ströndina, en þá var bara uppi rautt flagg og mikill vindur og öldugangur svo við börðumst bara við öldurnar í smá stund.

Gunnar dró okkur á söngstund á barnum Why Not Lago þar sem við sungum María, María og Kötukvæði með skemmtilegum kerlingum og harmonikkuleikara.  Oftast borðuðum við í eða kringum Yumbo center, og eitt kvöldið eftir góða borgara duttum við í smá stuð og karaóke.

Á laugardegi (dagur 5) fórum við með rútu til Las Palmas á fótboltaleik, Las Palmas og gestirnir Real Valladolid frá norður spáni, 2:1 fyrir heimamönnum.  Það var mikið fjör á vellinnum og haf af gulklæddum gestum, við kíktum aðeins í mallið, löbbuðum í gegnum bæinn og jólamarkaði og tókum svo rútuna heim.

Eftir fótboltaferðina varð Gunnar bara virkilega veikur svo við fórum til læknis á mánudeginum (dagur 6) þar sem hann var greinilega kominn með þetta í lungun. Hann fékk fína þjónustu og lyfseðil og greiddi mjög lítið fyrir lyfin.

Þá var það undir okkur Pétri komið að skoða bæinn og færa sjúklíngnum bjargir.  Ekki vissi svo betur til en að á degi 11 var ég líka orðin veik og átti slæma þrjá daga. Þegar þetta er ritað á degi 13 er ég nægilega hress svo við Gunnar gátum farið út að borða í fína steik. Hann tók reyndar rútuna til Puerto Rico í Mogan Mall í klippingu og búðaflakk enda komin með nettan "cabin fever"  Pétur er búinn að vera frábær, hlaupandi í búðir og apótek fyrir okkur mörgum sinnum á dag, en hefur samt náð að sleikja vel sólina, klára að lesa Hobbitann og kíkja aðeins út á lífið. 

Hótelið er lítið íbúðahótel í hring, við horfum yfir til nágranna okkar og heilsumst, nokkrir eru búnir að skreyta hjá sér með jóladúkum, jólastjörnum og seríum og þýsku hjónin með tengdasonin við hliðina á okkur hafa græjað vínglös og almennilegar kaffikrúsir sem hótelið býður ekki uppá.

Eflaust hefur kuldinn ekki hjálpað okkur að halda heilsu, en næst þegar við förum á þessar slóðir munum við taka með okkur góða sokka og náttföt, og svo er líka gott að hafa vit á því að biðja um auka teppi ef þarf. 

Hér eru allar myndirnar

Annáll 2023

 Þetta ár byrjaði með nýjum áskorunum, við vorum nýbúin að fá fregnir að Gunnar var með krabbamein á tungunni. Það var skorið burt 17. janúar og teknir eitlar úr hálsinum. Við tók svo langt og strangt ferli að fá sárin til að gróa og hætta að blæða.  Þessi vandræði tengdust náttúrulega því að hann þarf að vera á blóðþynnandi lyfjum vegna hjartalokunnar, og þurfti að feta þarna vandrataðan milli veg. Ég skráði ekki hvenær þessu lauk en það var trúlega ekki fyrr en í febrúarlok. En þá fór hann að braggst hratt og vel og fór fljótlega í vinnu.

Í mars fórum við á Draumaþjófinn með Guðmund Pálma og Viktor.

Í mars fór ég til Osló á NERA ráðstefnuna og strax daginn eftir skunduðum við með Hrafnhildi, Baltasar og GAbríel til Liverpool, við borðuðum mikið á skyndibitakeðjum, þeir fóru á leik í Manchester eftir að Liverpool leikurinn sem var markmið ferðarinnar var felldur niður og við Hrafnhildur fórum og sáum Disney on Ice í höllinni sem Eurovision átti svo að fara fram nokkrum vikum síðar.  Svo heimsótum við Anfield og skoðuðum miðborgina.

Um páskana í byrjun apríl fengum við þá fínu hugmynd að fá rafmagnshjólin lánuð hjá Ínu og Möggu, ekki vildi betur til en að við vorum varla lögð af stað þegar ég klúðra einhverju og keðjan fór af. Það var ekki vinnandi vegur að ná henni á aftur svo við snerum við settum hjólið á bíl, en Gunnar var ákveðinn að hjóla heim úr Laxakvíslinni. Það vildi ekki betur en svo en hann datt rétt við Cintamani og kom heim illa til reika. Seinna sáum við í hjólaappi sem ég hafði sett í símann hans, að hann hafði tekið krókaleið heim, beygt til vinstri inn Arnarhraunið, svo niður Krókahraunið og þaðan heim. Hann vissi aldrei hvað varð til þess að hann datt, en hann fór á slysó og hausinn var myndaður í bak og fyrir en ekkert fannst. Aftur á móti slasaðist hann á öxl og viðbeinið stendur enn uppúr henni og skiptar skoðanir á hvort eitthvað eigi að gera í því. 

Baltasar fermdist svo 16. apríl og haldin var fín veisla og afinn tók myndir.

Þegar sól hækkaði á lofti fengum við Daða og Dísu í mat o og líka Huldu og Birgi og gátum setið úti á palli 21. apríl.

26. apríl var svo viðburður ársins þegar ungfrú Jónsdóttir fæddist fyrir tímann og næstum því í beinni útsendingu þar sem ég var með fríðunum í saumó og pílu.  Hún dafnar rosalega vel, er síkát og brosandi.  Við gáfum henni bílstól og það var gaman að fara með Kalla að græja það.

Hún var svo skírð Perla Dís Ottesen Jónsdóttir þann 15. október. Séra Baldur skírði og veislan var á Mánagrund.

Við þrjár systur fórum í bústað fyrstu helgina í maí, alltaf jafn notalegt. 

Í maí skaust ég líka með samstarfsfólki til Kaupmannahafnar að skoða skólahúsnæði þar sem við erum á haus í þannig pælingum vegna flutninga sviðsins í Sögu.

13. maí hélt ég Eurvision partý og Pétur bakaði pizzur ofaní okkur í nýuja pizzuofninum sínum.

Í maílok fórum við svo með Oddfellow til Portó, skoðuðum mikið, borðuðum saltfisk, fórum á Fadó kvöld drukkum dásamleg vín of efldum vinskap við nýja vini.  Óvæntasta ævintýrið var samt það að ætla á Robbie Williams tónleika á hátíð sem var þarna. við töldum okkur vera búin að kaupa miða en samdægurs kom í ljós að við fengum ekki miða, en nutum tónleikanna samt í botn á gangstéttinni fyrir utan með hundruðum mans.

Þegar Gunnar og hinir fóru svo heim fór ég með rútu til Lissabon á fund um stafræna borgaravitund og eignaðist enn nýja vinkonu hana BErgþóru og við áttum góðan fund og skemmtilega samveru.

Svo var götugrill á Klettahrauninu.

7. júní varði hann Benjamin svo doktorsverkefnið sitt en þetta er í fyrst skiptið sem ég er í doktorsnefnd með Berglindi og Veli-Matti og Allysona aðalleiðbeinandi.  Ég bauð í veislu í tilefni varnarinnar.

Í júní fórum við í mikið ferðalag, fyrst í húsaskipti í Kaupmannahöfn, hjóluðum töluvert en ég varð líka lasin. Svo fórum við til Þýskalands, hittum Möggu og Ínu og sváfum í Glamping.  Þaðan lá leiðin aftur til Danmerkur í heilmikla 25 ára brúðkaupsafmælisveislu Röggu og Bjarts í Favsbjerg.

Svo leið sumarið heima með smáfólki í heimsókn, spilagleði hjá Gerði, gestum á pallinum. 

Í ágústbyrjun fórum við á Vog  á Mýrum og höfum aldrei fengið eins dásamleg veður til að leika okkur, róa og synda í sjónum.

Við kíktum á Iðunni og Stebba sem flutt eru á Vatnsnesveginn í Keflavík og búin að gera mjög flott hjá sér.

19 ágúst héldum við loksins pallapartýið, gerðum pulled pork, keypti píluspjald og þeir sem mættu skemmtu sér vel við leiki og karaóke.

16. september var ættarkaffi hjá afkomendum Sigurjónu og Þorsteins, ömmu og afa Gunnars í móðurætt sem voru þá 307.

Dóra og Bjartmar voru í heimsókn í september og við fórum með þau hring um Reykjanesið og borðuðum úti í Garði.

27. september vorum við aftur komin á flakk, þá til Bristol með Kór Víðistaðasóknar, heimsóttum líka Cardiff og sungum í tveim kirkjum. Við fórum á söngleikinn Charlie and the chocolate factory og Gunnar og Hjörleifur á fótboltaleik meðan við skoðuðum brú og fórum í hoponoff.  Kórinn var líka duglegur. Við fluttum Faure Requiem með kórum Kjalarnesprófastsdæmis í febrúar, tónleika í maí og aftur í nóvember ma vegna 50 ára afmælis stjórnandans sem finnst ég alltaf vera í útlöndum. Skil ekki þetta rugl í honum!

Þegar kórinn fór heim flugum við Gunnar til Barcelona og svo í leigara til Sitges til að halda uppá 50 ára afmæli Huldu systir.  Þetta var svka fjör, fórum á ströndina, á marga bari, til Barcelona í Sagrada famili og food tasting tour.  á afmælisdaginn var svo flottur dinner á dragshowi sem var geggjað.

Enn einu sinni fór ég á flakk í lok október og fór þá með 1966 vinkonunum til Norður Karólínu að heimsækja Björgu. Við áttum notalega daga, fór vel um okkur í ristastóra húsinu þeirra og veðrið notalegt. Einar eldaði oft, meðal annars djúpsteiktan kalkún og svaka steik. Við keyrðum töluvert bæði í næstu bæi, til Myrtle Beach þar sem sumar fóru í golf og við allar í súpergolf. Síðan í Biltmore House, og svo auðvitað í mollin og outletin og komum heim með svona 70 skópör og troðnar töskur.

Langþráð Oddfellow árshátíð var svo í nóvember, þetta eru einu skiptin eiginlega þar sem við dönsum svo ég splæsti bæði í nýja eyrnalokka og krullur og notaði loks kjólinn sem keyptur var 2020 rétt fyrir covid!

Guðmundur og Viktor gistu nokkrum sinnum en allaveg 25. nóvember og þá var lífið orðið skrýtið hjá Viktori því búið var að rýma Grindavík þann 10. nóvember vegna hættu á eldgosi og við fórum með Viktor að keppa í fótbolt og á skautasvellið þar sem Grindvíkingar fengu frítt inn. 

En gosið kom svo 19. desember, https://eldgos.is/eldgos-vid-sundhnukagiga/  þetta er erfiður tími fyrir fólkið okkar Ingvar, Kristínu og þeirra börn sem eru búin að setja allan sinn pening og orku í að gera upp hús sem þau keyptu í Grindavík í sumar. Það er eftirminnilegt kvöldið þegar Kristín hringdi í okkur og sagði okkur að það væri komið gos. Þau rýmdu sitt heimili, fóru fyrst í orlofsíbúð en svo í bananablokkina í Hafnarfirði. Viktor 

Við hófum framkvæmdir í desember, fengum rafvirka til að endurnýja tengla og töflu og setja inn ný ljós. 

Desember var fínn, við fóurm í partý með 1966 vinkonunum, á jólahangikjöt menntavísindsviðs sem líklega er í síðaasta skipti í stakkahlíðinni. Mjög fínt jólaboð Oddfellow þar sem Gurrý skemmti okkur konunum. J'olaveinninn heimsótti Lilju og vinkonur hennar. Við vorum tvö á notalegu aðfangadagskvöldi. Liðið kom til okkar á jóladag og Kristín og Lilja með sitt lið komu á gamlárskvöld en við Viktoría vildum helst vera inni og ekki horfa á háværa flugelda.

Við fórum á Fíu Sól 30. des með Viktor og Guðmund Pálma. Þeir gistu báðir en þetta var ekki auðvelt, enda taka þeir þetta ástand greinilega báðir nærri sér.

 Annars endaði ég árið með von í hjarta en samt þungt í sinni þegar ég keyrði Jón á Vog 21. desember.  Af öðrum er það að frétta að Lilja vinnur á tannréttingstofunni, Viktoría og Kristófer eru spræk á sínum leikskólum og fara aðrahverja helgi til pabba.  

En góðu fréttirnar eru þær að Birkir og Bergþóra eiga von á barni með vorinu.

Hér er svo gott úrval af myndum frá þessu fjölbreytta ári.

Djúpivogur júlí 2021

 Við höfðum fyrir þetta sumar skipulagt mikla reisu um Austurland.  Hún varð styttri en á horfðist en samt dásamleg og skemmtileg.

Við gistum í Vík hjá Hildi Árna, borðuðum á Súpufélaginu og heimsóttum brugghúsið Smiðjuna ég mæli sko með því bæði mat og bjór.

Síðan lá leiðin á Djúpavog þar sem við gistum allan tímann síðan með verslunarstoppi á Höfn og nesti úti í móa. 

Steingrímur tók vel á mót okkur og við gistum í sérhæð sem hafði allt til alls. Gunnar og Daði fóru í veiði fyrstu dagana við lítinn afla. 

Ég hvíldi mig, heimsótti sundlaug, eldaði og hafði það huggulegt. Svo var ég með tölvuna og flokkaði myndirnar hans pabba í gríð og erg. Reynda kannski nóg að gera að fylgjast með Steingrími sem var alltaf að fá senda hluta af búslóð sinni enda ætlar hann aftur að hafa vetursetu á Djúpavogi í íbúðinni fínu sem hann leigir af tveim fullorðnum systrum.

Á myndunum má sjá að við höfðum það gott, elduðum góðan mat og fengum sundowner drykki hjá Steingrími, negroni og uppskrift hans af "light introduction to Guinnes" sem samanstendur af 2 hlutum dökkum bjór og 1 hluta freyðivín, hljómar ólíklega en er virkilega skemmtilegt.

Ég reyndar fékk forskot því Steingrímur bauð mér í drykk með Kristínu Dagmar sýningarstjóra sýningar Sigurðar Guðmundssonar listamanns, og stöllu hennar Hildi Rut. Sigurður er nágranni Steingríms og mjög skemmtilegur karl og umhugsunarverður listamaður.

Við tókum svo rúnt eftir að veiði lauk, keyrðum yfir Öxl yfir að Lagarfljóti þar sem við kíktum á Möggu sem var þar í útlegu, svo í kaffihlaðborðið fína á Skriðdalsklaustri. Þaðan meðfram fljótinu vestanmegin að Egilstöðum að heimsækja búðir og veitingahús í blíðunni sem var mikil meðan þoka lá niður á Djúpavogi.

Gunnar heimsótti svo Útnyrðingsstaði rétt utan við Egilsstaði og átti langt spjall við frænda sinn þar, en afi Gunnars bjó á sínum tíma þarna og bræður hans sendir þangað í sveit. 

Næst lá leiðin á Breiðdalsvík í annað brugghús Beljandi, þar fengum við Hrút, frábæran stout, lamba bláberjasnakk og þeir kíktu á fótboltaleik, eitthvað EM dæmi.

Daði kvaddi okkur svo og við tóku meiri rólegheit, tókum góðan göngurtúr og kíktum á helstu túristastaði, Löngubúð og Eggin í gleðivík sem eru eftir títtnefndan Sigurð. Við vorum að velta fyrir okkur stöplunum undir þeim, að þetta hefði nú verið mikil framkvæmd en í ljós kom að þeir voru þarna síðan færiband lá frá höfninni að Bræðslunni sem nú er nýtt í listsýningar en verður víst bráðum kassaverksmiðja, fyrir kassa fyrir lax sem er mikilvægur atvinnuvegur þarna á staðnum. 

Svo fylgdumst við með hinum atvinnuvegnum en það er að taka á móti skemmtiferðaskipum í löngum bunum, sumir rölta um plássið meðan aðrir skella sér í rútu á jökulsárlón.  Svo fór líka að Steingrímur yfirgaf okkur með einu slíku til að taka túra í kringum landið og leiðsegja ferðamönnum.

Við undirbúninga ferðarinnar var ég búin að sjá að góðar sandfjörur væru við Djúpavog og var ákveðin í að fara í sjóinn, þegar við loks fórum var komið brim og læti en ég lét það ekki stoppa mig, en fór stutt þar sem aldan var sterk.

Það var óvænt ánægja að Ásta Júlía og Ágúst áttu leið um og komu til okkar í mat á föstudagskvöldið og keyrðu svo áfram á suðurleið.

Steingrímur missti af laugardeginum þegar afhjúpað var minnismerki um Hans Jónatan, við fluttum upp til að víkja fyrir öðrum gestum sem höfðu flutt þingsályktunartillögu um minnismerkið.  Strax á eftir var svo opnuð sýningin The universe is a poem, með nokkrum gjörningum. Meira að segja einum sem ég tók þátt í og varð þar með lifandi ljóð.

Katrín Jakobsdóttir var á staðnum til að afhjúpa minnismerkið og opna sýninguna og Gunnar gaf sig á tal við hana og fékk mynd með uppáhaldsstjórnmálamanninum sínum þessa dagana.  Deginum lauk svo með heilmiklu samkvæmi hjá Sigurði.

Við ókum svo alla leið heim, stoppuðum á Þorberssafni, á Jökulsárlóni og svo aftur í smiðjuna á Vík. Með okkur í för var Inneke tengdadóttir Sigurðar og Inneke.

Þetta voru frábærir daga og ég held við hlökkum bæði til að heimsækja Djúpavog aftur og sjá meira af Austfjörðum.

Hér eru svo allar myndirnar

2021 Mars

 Mér finnst ástæða til að skrifa blogg um þennan mánuð, nú er ár síðan Covid byrjaði, ég er meira og minna búin að vinna heima í heild ár, fyrir utan smá tíma í sumar og Gunnar í sumar og fyrri hluta þessa árs.

En að skemmtilegri hlutum þá langaði mig mest að segja frá því að við fórum í Stykkishólm í 6 daga og gerðum alls konar skemmtilegt. Viktor Darri var með okkur fyrstu fjóra dagana spiluðum mikið slönguspil, teiknuðum, horfðum á teiknimyndir. Ég vann aðeins en þeir félagarnir skoðuðu Stykkishólm ,verslanir bæjarins og strandaðan Baldur. Veðrið var leiðinlegt, hávaða rok og leiðindi, þannig að við Viktor ætluðum í sund en hann missti móðinn í sturtuklefanum, líklega þegar kona í sturtunni talaði mikið um rok og kulda þarna úti.

Daði og Dísa komu svo á föstudeginum, við borðuðum góðan mat, allt keto að þessu sinni, fórum í góðan göngutúr með heimsóknum í keramikverkstæði. Ásta Júlía og Ágúst komu svo þegar aðein leið á daginn, Ágúst ólst upp í plássinu og fóru með okkur í bíltúr með leiðsögn og sögum áður en við elduðum nautalund með bernais og kjöftuðum langt fram á nótt.

Á sunnudeginum keyrðum við fyrir nesið í dásamlegu veðir og skyggni með viðkomu í kaffi hjá Helgu á Arnarstapa og kvöldmat í Food station í Borgarnesi.

Annað skemmtilegt í mánuðinum var að horfa á Hrafnihildi í sýningunni Unglingar, mikið fjör og skemmtileg sýning. 

Við keyptum húsgögn á pallinn í Rúmfatalagernum. Jón og Ingvar settu þau saman. Stóru strákarnir komu með og hreinsuðu laufin af þaki nágrannans og aðstoðuðu við samsetninguna.  Ingvar kom næsta dag
og við fylltum gróðurkassana af mold svo nú eru þeir tilbúnir fyrir plönturnar.

Við fórum í mat til Kristjáns og Rhonu sem eru búin að vera hér síðan um jól vegna Covid-19.  Hulda, Birgir og Vigdís voru í mat hjá okkur þegar eldgosið í Geldingadal byrjaði. Ég fór í saumaklúbb til Erlu í nýja húsið þeirra. Síðast en ekki síst komu pabbi og Þórunn til okkar í svið en myndavélin fór ekkert upp í þessum boðum því miður.

 Annars eru allir hraustir, Kristófer og Viktoría fengu RS vírus en eru orðin hressari og kíktu í pottinn en engar myndir voru teknar. Kór Víðistaðakirkju var byrjaður að æfa og búinn að syngja eina fermingu og tvær messur en svo var öllu skellt í lás þann 25. þegar strangari reglur voru settar og meðal annars öllum skólum lokað til 15. apríl.  Bergþóra er að skrifa BS ritgerðina og klára síðustu námskeiðin og Jón hamast í háskólabrú.

2019 - annáll

Ef þessi annáll ætti að fá titil, þá væri hann barnabörnin, ferðalög, framkvæmdir og ferðalög.

Ég veit eiginlega ekki hvar ég á að byrja þennan póst, ætli það sé ekki best að byrja á framkvæmdunum.  Lítill leki inni á baði varð til þess að við helltum okkur í allskonar framkvæmdir, í báðum baðherbergjum, þvottahúsi og forstofu.  Meira um það hér.

Aðrar framkvæmdir voru þær að við fengum Reyni til að koma og gera múrviðgerðir undir gluggum og loka ruslageymsluopinu.  Svo máluðum við allt að utan, ég og Bjössi höfðum byrjað í fyrra, aðallega á gluggum en nú tókst að klára þetta nokkrunveginn með góðri hjálp. Jón, Pétur, Bergþóra og Ingvar tóku í pensil, en Daníel að öðrum ólöstuðum var ómetanlegur í hjálpsemi, hann kom tvisvar og rúllaði allt húsið eins og það lagði sig í hvorri heimsókn.  

 Garðurinn var villtur og skemmtilegur á þessu dásamlega sumri, fín kartöfluuppskera, gulrætur, metuuppskera af rifsberjum, sultaði, frysti og gerði líkjör.

Þessa árs verður samt mest minnst sem ársins sem Kristófer Onyaga Daníelsson sonur Lilju Bjargar og Daníels kom í heiminn, 2. febrúar 2019,  hann er kröftugur og klár, fór að ganga 8 mánaða og er orðinn heilmikill karakter.  

Við höfum líka kynnst bónusbarnabörnunum betur, en Hrafnhildur og Baltasar eru börn Ingvars og mestu ljúflingar.  Hér er allt liðið í myndatöku nú í desember þar sem sá stutti átti alla athygli og mikið verkefni að festa hann á mynd.

Við fórum nokkrum sinnum að horfa á Gabríel í júdó og bíðum spennt að sjá Baltasar í fótbolta og Hrafnhildi í dansi. Guðmund sækjum við stundum og fáum að eiga með honum góða stund, teiknum,  poppum byggjum legó og heimsækjum róluvelli hverfisins.  Viktor hefur líka komið oft á árinu í sama prógram og þykist eiga í okkur hvert bein.  Hann kemur stundum í pössun en ef of langt líður á milli sækir afi hans hann bara. Viktor syngur  mikið og oft "Afi hann er amma mín.... " og "Afi minn og amma mín á Klettahrauni búa...." en hlær mest þegar kemur "afi datt í drullupoll og amma fór að góla" Hér eru kútarnir með mér á afmælisdaginn minn.

Annað sem stendur uppúr á árinu eru bátakaupin, Gunnar og Daði keyptu í félagi 1/6 í Heiðari og fóru til fiskjar og buðu mér og ýmsum öðrum í siglingu um sundin blá.  'Í fyrstu ferðunum fiskaðist vel og allir frystar fylltir af þorski og fiskibollum.

Af öðrum er mest gott að frétta, Pétur er í Héðni og býr enn í Kef, Jón og Dagbjört í Innri-Njarðvík í sínu brasi, Ingvar og Kristín eru hér rétt hjá okkur í firðinum og Kristín í félagsráðgjafanámi, Bergþóra búin með 3 annir í hagfræði, vann í skemmtigarðinum í sumar og í frístund í Hraunvallaskóla með skólanum.  Daníel er kominn með kennitölu og fínt lagerstarf og Liljá er í sínu starfi í Laugarásnum. Pétur skellti sér til USA á frisbee golf mót og þaðan er myndin.

Anna og Bob frá Alaska komu í heimsókn í júní með Dóru Stínu og Eliott bróðir hennar og auðvitað fóru þau á sjóinn.

Í september komu Dóra og Bjartmar í heimsókn og við áttum góðan dag á Þingvöllum, fórum á tónleika hjá ungsinfóníunni og snæddum saman. 

Gunnar fékk svo nýja reynslu í ágúst og fór og sá miss universe að styðja bróðurdóttur sína hana Huldu.

Svo eru það öll ferðalögin.

Mars: Makey/Digilitey ráðstefna í Manchester með helgarstoppi hjá Huldu í Grimsby

Mars: Náttúrufræðimenntunar ráðstefna á Akureyri þangað fylgu Gunnar, Daði og Dísa mér, þau lékur ferðamenn.

Apríl: DCE fundur í Strasbourg

Apríl: meiriháttar ferð til Sardiníu og Korsíku með Daða og Dísu, (er efni í heilan póst sé til hvort ég skrifa hann bráðum) Stoppuðum í Zurich bæði á útleið og heimleið.

Maí; dagsferð með Samkórnum um suðurland.

Maí: wTwinning ráðstefna í Brussel sem Gunnar fylgdi mér á, sjá póst hér.

Júlí; fengum að gista í Bjarmalandi meðan það var vatnslaust heima.

Ágúst: verslunarmannahelgin hjá Möggu og Ínu í Rjóðrinu, Jón og Gerður komu með, Iðunn og Stebbi voru á Bjarmalandi svo það var heilmikið fjör.

Október: Edinborg með Samkórnum og sungið bæði þar og í Glasgow.

Nóvember: Digichild fundur í Helsinki með Skúlínu

Nóvember: annar DCE fundur í Strasbourg

Desember:  Bjartur, Gerður og ég vorum á kránni yfir jólin með flestu okkar fólki og pabba í dásamlegu yfirlæti með miklum mat spilum og frábærum félagsskap. (líka efni í heilan póst sem kemur kannski síðar)

Þetta var líka mikið afmælisár, Iðunn varð 45 og bauð í mikla veislu í sveitinni í ágúst.

Tvíburarnir urðu fimmtugir og Gerður hélt mikið uppá það svo við fórum í tvö meiriháttar sumarpartí.

Bjartur hélt uppá sitt afmæli 21. des á kránni í stórveislu með miklu borðhaldi, Banditarnir spiluðu fyrir dansi og við skemmtum okkur dásamlega með vinum og systkinum.

Tónleikar, leikhús og annað skemmtilegt:

Janúar:  Sálin hans Jóns míns í Bæjarbíó með Iðunni og Stebba

Janúar: Ronja ræningjadóttir með Guðmundi Pálma og Baltasar .

Febrúar: Kór Víðistaðakirkju í partý hjá okkur

Mars: Söngvakeppnin með nöfnu og Hrafnhildi

Maí: út að borða með Altakórnum

Júní: Hárið með leikfélagi Hvammstanga í Þjóðleikhúsinu

Júlí: Eiríkur Hauksson afmælistónleikar

Raggi Bjarna afmælistónleikar

Ágúst: Matarboð og myndlistarsýning hjá Kristjáni Jessen og Rhonu

Ágúst: sveppaferð í Heiðmörk með Ástu Júlíu, 

September: ljósanæturrölt með saumaklúbbnum

8. okt, bæjarrölt með fimmtugum

13. október, notuðum jólagjöfina frá Bergþóru og fórum á Hótel Flúðir í rólegheita afmælisfagnað bóndans.

20. okt, hauslitaferð með Arnþóri og Elínu.

1. nóvember Salvador Sobral, með Krisínu Jónsdóttur

Nóvember: afmæli hjá Össa í Þorlákshöfn

Desember: Þór Breiðfjörð söng Nat King Cole í salnum.

Desember: Matarboð hjá Ástu Júlíu og Ágústi

Hér er líka ótalið allar kóræfingarnar og tónleikar bæðu um vor og jól, saumaklúbbar, systrahittingar og vöfflukaffi, greinilega alltaf nóg að stússa hjá okkur.

Annars erum við bara hress, fórum í Heilsuborg í haust og heldur minna til af okkur en í ágúst, með auknu þreki og hressleika. Við hlökkum bara til 2020 sem verður örugglega líka skemmtilegt eins og þetta fjölbreytta ár.  Fullt af ferðaplönum á prjónunum og nýtt barnabarn og annað skemmtilegt í vændum!

Hér eru meiri myndir